Mele Maanathe മേലെ മാനത്തെ

മേലേ മാനത്തേ മൂളക്കം കേട്ടേ ചേലോലും കുട്ടിക്കുറുമ്പേ
ചോലക്കാറ്റിന്റെ ചൂളം വാങ്ങണ്ടേ, കാണാത്തൊരു തീരം തേടേണ്ടേ
കണ്ണെത്താ ദൂരെ, മഴവില്ലിന്നും മേലേ
ഒരു പട്ടോല പൂപ്പന്തല്‍ കെട്ടിയോരുക്കേണ്ടേ

കുന്നിന്‍ മേലൊരു കുത്തുവിളക്കിന്‍ ചന്തം കാണണ്ടേ
പൊന്നിന്‍ നൂലുമണിഞ്ഞു ചിരിക്കണ പാടം നോക്കണ്ടേ
പാളേലേറ്റി വലിച്ചിട്ടൊത്തിരി ദൂരം പോവണ്ടേ
പോളപ്പെണ്ണോടൊന്നു പിണങ്ങാന്‍ കല്ലുപെറുക്കണ്ടേ

വിരിയും നറുമലരിന്‍ ചിരിയഴകില്‍ തെളി നിറയുന്നൊരു ഗ്രാമം-
കഥകള്‍ പറയുന്നേരം കാതു കൊടുക്കണ്ടേ
പുതു പയ്യാരക്കല്ക്കണ്ടം നുള്ളിയെടുക്കണ്ടേ!

മണ്ണില്‍ പൂത്ത വെയില്‍ക്കണിയാദ്യം കണ്ണിലുദിക്കണ്ടേ
കന്നിനിലാവൊളി കാണാനക്ഷര മുറ്റത്തെത്തണ്ടേ
മാളോര്‍ക്കുള്ളു നിറയ്ക്കാനിത്തിരി ന്യായം നേടണ്ടേ
മിന്നും നാക്കില വച്ചു നിറച്ചും നന്മ വിളമ്പണ്ടേ

കുയിലിന്‍ നറുമൊഴിയില്‍ പൊന്‍ ഇളനീര്‍ മധു കിനിയുന്നൊരു-
നാടന്‍ പാട്ടുകള്‍ മൂളും നേരം താളമടിക്കണ്ടേ
മണിമഞ്ചാടി പൂക്കൂടകളെണ്ണി നിറയ്ക്കണ്ടേ